batak itu keren

Hillophillop Ni Lampoting di Sosor Manhattan (2)

Posted on: 7 Maret, 2009

“Ido ra. Alai ndang na pamalomalohon ahu da. Na boi hugombar tu Alaska ima songon sada adaran na mansai bidang jala marambolas batu. Songon angka pangabahan na marudan hapas tingki marhabahaba. Goarna didok salju. Dungi angka bondul ni halak Eskimo marlunggulunggu songon dambirbir.”


Hillophillop Ni Lampoting di Sosor Mahattan


Dalam naskah bahasa Indonesia ditulis “Manhattan”. Tapi penerjemah sengaja menuliskannya dengan “Mahattan” untuk menyelaraskannya dengan pelafalan Batak Toba

Karya: Umar Kayam
Terjemahan: Thompson Hs

IA hundulma nasida mangirsangirsa di parate huhut minum na pang margalas be. Di si Marno goarna scotch jala martini di si Jein. Dao tu duru ni jandela rapma nasida nadua manatapnatap.

“Idama bulan i, Marno. Songon teni manuk.”

“Teni manuk?”

“Ung, songon ima nian alusi. Na piolet, nangi?”

“Molo songon i, boha ia borna ni langit dohot holomholomna i ?”

“Oh, ndang tarbuhul ahu sahat tusi. Sandok bulan i na piolet huida.. Na pio-let. Sahali nari, songon teni manuk na piolet!”

“Ah, hunik do songon renteng ni pidong.”

“Ee, bajang! Pajonggor jolo simalolongmi. Manang laho ma ho marsogot mamareso tu pandaoni.”

PINTOR tindang Si Marno, meret dingkan pudi manamba aek ngali na ngaltek tu galasna. Dungi dipahundul muse tu lambung ni si Jein di parate. Dihilala jujungna hira naeng mordong.

“Marno, hasian.”

“Aha muse?” alusna tu si Jein.

“Boha ulaning didok roham di Alaska?”

“Di lumban Alaska? Diama huboto i puang. Ai so hea dope ahu tu Alaska.”

“Na husungkun, boha do nuaeng ari disan?”

“Huhilala ndang sangali ari rondo be. Nda adong do tong logo ni ari di Alaska songon summer dison?”

“Ido ra. Alai ndang na pamalomalohon ahu da. Na boi hugombar tu Alaska ima songon sada adaran na mansai bidang jala marambolas batu. Songon angka pangabahan na marudan hapas tingki marhabahaba. Goarna didok salju. Dungi angka bondul ni halak Eskimo marlunggulunggu songon dambirbir.”

“Dage tutu! Alani i boi do ho muse huhilala gabe pangangkil. Uli hubege hatam, songon marumpasa mandok barungbarung ni halak Eskimo i. Nimmu, songon dambirbir….”

“Ditanda ho do ra Si Tommi. Ima niolingku, raja nialualungku hinan, si barumunku na…. Eh, olo do ho pajimpo sagalas di ahu…. ah, ndang hea boi dipature ho martini. Asa sai busisaon do ho marningot gin dohot vermouth dohot sampuranna na sada nari, bourbon! Nda tutu? Ah, tahe. Dokma hupause muse tu….uuuuuuph….”

NUNGA mapal si Jein laho tindang jala masokasok mangalangka dingkan dapur. Sian i tarbege maradu soara ni botol tu galas, marlitingliting. Sian i muse disangahon si Jein dope marlaning.

“Marno, ndang naso ditanda ho si Tommi. Amang¬amanghu, hallethu hinan. Dibege ho do hasian?”

“Ouuu, hubege. Apala aha di halletmi binsan taringot?”

“Di Alaska do nuaeng ibana huhilala,” didok si Jein huhut enetenet muse padonok tu si Marno di parate.

“Panggaruanma i di Alaska. Ulahima jolo laningmu taringat tu Alaska, Marno.”

“Alai pitu ari na salpu didok ho do ibana di Teksas manang di Kansas. Molo ndang sala didok ho do muse di Arkansa.”

“Bege jolo da, hasian.. Ningku, hu-hi-lala si Tommi nuaeng di Alaska.”

“Oooh.”

“Ra ndang manang nanap didia pe!”

DIPATINDANG si Marno dirina laho pagalak radio. Saleleng dipajangkitjangkit putotputor ni radio i tarbege angka soara na marsampur, angka ponggol ni ende na baur rap dohot soara ni halak na mongkikhongkik. Alani i tumagonma dihilala si Marno muse ibana hundul di parate. Dipaintopma radio i.

“Ito Marno, hasian.”

“Dokma muse sidohononmu, Jein.”

“Ndada tutu do adat ni par Alaska mangalehon parsondukna tu tamue?”

“Hea do tutu hubege na songon ido na hinan halak Eskimo. Alai ndang apala tangkas huboto buhul ni adat si songon i manang na sintong manang holan laning ni angka pande do, songon laning sian guru pangajar antropologi.”

“Sai panggaruanma i. Tutu jala situtu, ito hasian. Sai panggaruan do i.”

“Dokma jolo alani aha.”

“Ala… ala, asa unang olo ahu si Tommi lungun jala ngalingalian sahalaksa di Alaska. Tutu, nunga margonti be si baoadi!”

“Nunga tangkas huroha diboto ho si Tommi ngalingalian di Alaska?”

Ditehe si Jeinma simanjujung ni si Marno asa dipadompak tu bohina. Dungi dipajonggor leakna tu si Marno.

“Na dirimpu ho do olo ahu si Tommi lungun jala ngalingalian? Nda undunghononmu dope?”

Sip si Marno satongkin paima mangapusapus haliang ni si mangido ni si Jein.

“Huantusi do i, Jein. Na tong do naeng huparhatutu na di roham.”

“Oh, tung baoa na jogi do ho di ahu, Marno.”

NDUNG dibege si Marno songon i dipagalakma timbahona asa jongjong donok tu jandela. las dibereng langit borngin i, asing sian humaliang ni bulan.. Rumindurindur ombun manang piga manghaliangi bulan gabe sipata paoru sindar ni bulan i. Dungi ditaithon si Marnoma simanjujungna dompak toru laho manaili angka inganan naung longo i. Ala lambok ni sindar ni bulan hera renge do idaon sude humaliangna. Gabe dihilala si Marnoma na marsilonging jala na bangbang martugarang tu pamatangna.

“Ito Marno.”

“Jein.”

“Gabe tompu huingot si Tommi tingki mangalehon sada sipumpe tu ahu. Lehet do sipumpe i jala diboan sian huta Oklahama piga taon naung salpu. Ndang hea dope hudok tu ho taringot tu sipumpe i, ate? Sipumpe ni halak Indian do i.”

“Huhilala nunga hea, Jein. Nunga piga hali.”

“Sai na pangggaruanma i.”

Opat manang lima hali didorguk si Jein nangetnanget martini jala ndang apala porlu be diboto naung piga galas didorguki martini i sahat tu na tiniopna disi. Ai sahalak pe soada na ingkon manisehon ibana.

“Ai diboto ho do tahe, Marno?”

“Aha i ?”

“Nunga digadis be rumabolon na margoar empire state buliding i.”

“Tutu do i jala nunga hujaha di surat kabar New York Times.”

“Boi do dihilala ho molo marjabu na tumimbo di portibi on?”

“Daong. Ia ho?”

“Boi. Ba boasa?”

“Songon diama panghilalaanmu?”

“Alai ndang huboto tahe. Hurimpu do boi sian i dapot na gere manang na erget. Alai saonnari hubotoma….”

Angka sindar na niida si Marno marhillophillop di duru adui gabe paingot ibana tu lampoting tingki bornginborngin di juma ni ompungna di huta.

“Ansugatna….”

“Ansugatna boha, hasian?”

“Ansugatna manghuling angka sese doho bojak bortung sian duru an.”

“Gabe boha?”

“Ndang boha. Asa saema saotik palambok pusupusungku.”

“E, tutuma ho par hutahuta.”

“Agia pe!” Alai songgot rohana mandok songon i. Ala tung timbo soarana mandok hata ‘agia pe’ i pintor mangampun ma ibana. “Tongma alani scotch ondeng i, ito Jein.”

“Ndada pola, ito Marno. Ahu pe ingkon mangido ampun do tu ho ala nunga pajuang hu.”

Ala ndang tardoksa mangampun na marbalos ampun i dipagedekma abarana.

Di ginjang bagas ni si Jein tarbege soara na ringo jala marlisik.

“Hes, jet! Na burangso on!” Huhut mapalapal dompak dapur songon i do bura ni si Jein ala ni songgotna.

SIAN bilut partapiananna dibege si Marno marlasak aek. Ndung mulak pe si Jein asa tangkas boasa marlasak aek i. Huhut maniop sagalas aek ngali, tarida maraekaek bohi ni si Jein ro dompak parate.

“Saotik sogar huhilala.” ninna huhut dipagadap pamatangna, papidom simalolongna jala paaitait patna dompak ginjang. Dungi marendema ibana songon pangandung bolon; tao na tung mansai dalom, deep blue sea, baby, deep blue sea, baby, mansai dalom do tao i, da ito….

“Di ari logo songon on hea do lomo roham marsaimara, dungi paaupaup diri dao tu toru ni tao, alai ndang mate jala boi marnida pamatangmu gadapgadap sian parau?”

“Ulahi jolo sahali nari. Ndang tarlapathu ganjang ni hatami. Boha ia ulahi jolo, Jein?”

“Ah, lupahonma i. Holan laninghu do i. Tao na tung mansai dalom, da ito, deep blue sea, baby, mansai dalom tao i….”

“Ito Marno.”

“Oung.”

“Ndang hea dope hita rap mardalandalan tu inganan ni angka dorbia na margoar Central Park Zoo i, ate?”

“Tutu do i, alai nunga jotjot hita tu porlakna i.”

“Diparsohot nami di bagasan na duapulu bintang ditambai na sampulu sada ari i, hea do si Tommi mangarahon ahu sahali tu Central Park Zoo. Bah, huingot hami marsinabul jonok tu lobu ni herek. Didok, simpanse ima bodat na jumonok tu pangalaho ni manisia. Ia hudok jegong do. Tambana didok, nunga dirajumi angka pande taringot tu bongka ondeng, alai sai tongtong do huporso: na jegong jumonok tu pangalaho ni jolma. Lumobima tingki i ala taringot situtu ahu muse tu sahalak panjaga harbangan di kantorna. Hea do tahe hulaninghon i tuho?”

“Nunga manang piga hali.”

“Ah, ito Marno. Nunga gabe dibege ho sude laningku. Ra alani i nunga marbiasbias be ahu di ho, ate?”

Ndang apala dialusi si Marno be ala tompu dihilala donok parsondukna borngin i ro tu sosor Mahattan. Na tutu do adong panorangion taringot sada halilu na marsirang marloksaloksa daona, alai boi mullop tung mansai donok?

“Ia alusi jolo ahu, Marno. Dokma ahu naung marbiasbias di ho, songon naung adong dipusupusumi. Laning tu laning ido dibege ho molo sai pajumpa hita. Bias ahu ate? Bias¬bias!”

“Alai ndang apala sude huparateatehon laningmu, jala tutu sian piga laningmi piga hali hubege tongtong….”

“Unang pola songon i dok, ito. Dokma nunga bahat manang pajotjothu.”

“Molo songon i nauli. Tung bahat hantusna hea hubege.”

“Gabe marbiasbias ahu, nangi?”

Dipasip si Marno. Dialsik timbahona jala diombushon sian igung dohot pamanganna.

“Nda na ingkon marlaning do ahu tu ho, Marno? Ahama na boi hubahen molo so marlaning? Ai huhilala na hita nadua nama nampuna sosor Mahattan on. Ai bohama ia molo sada sian nampuna pulo on gabe loja marlaning? Molo dua halak mampar di sada pulo, nda ingkon marlaning nasida torus paima adong tarida hopal?”

SIDUNG i dipapijom si Jein simalolongna huhut pagadaphon dirina di parate. Dipapeak ponji di andorana. Dungi tompu dungo, jongjong satongkin jala hundul muse di parate i.

“Jo Marno, hundul ho tuson.”

“Agia boha? Nda na sian botari ahu holan na hundul disi?”

“Ro jolo tuson hundul.”

“Na sonang dope huhila di jandela on, Jein. Ala Huida angka na marhillophillop di adui.”

“Na marhillophillop boha?”

“Ou, olo.”

“Boha leak ni hillophillop i? Ndang hea dope hupanotnoti.”

“Ima angka palito na menek, sa pardomuan ni simalolong nosanna.”

“Tutu mansai gelleng?”

“Olo. Alai molo adong marloksaloksa nasida songgop di hau na di duru di dalanan, boha ulaning berengon sian on?”

“Gabe songon gabagabama antong hau i.”

“Tutu, gabagaba di ari pesta.”

Dipagalak si Marno muse timbahona huhut hira na tarhatotong. Dipadompak bohina torus tu duru ni jandela, manatap tu sada pusoran na dao ndang tarnanap.

“Tingki gelleng ho…. Dibege ho do tahe, ito Marno?”

“Hubege.”

“Tingki dakdanak ho, hea do adong meammeam haholonganmu?”

“Meammeam boha i?”

“Meammeam na tung di haholongi roham nang pe tudia ho mangalangka.”

“Ndang boi be huingot sahat tusi, Jein. Na Huingot ndung antar balga ahu lomo do rohangku tu horbo ni ompungku na digoarina si galampang.”

“Molo horbo ndang meammeam, alai na piniaro do i.”

“Tong do boi na piniaro pinarmeammeam.”

“Alai ndang torus. Na jolo adong meammeam na apala huhaholongi. Goarna si uncle Tom.”

“Aha nimmu, si uncle Tom?”

“Ima sipumpengku na birong jala tung roa leakna. Alai molo si uncle Tom ndang adong di lambungku ndang boi ahu sink modom.”

“Huhilala sai na gabeak do si songon i. Si minikhu pe tong do songon i. Adong biangbiangna margoar si lumpi.”

“Alai ndang sadia leleng dope ahu marsirang dohot si uncle Tom ndung pajumpang dohot si Tommi di rongkanan partimbo. Huhilala na lomo dope rohangku si uncle Tom adong jala jonokjonok tu lambungku.”

DITAITHONMA ponji ba dilambungnai asa dipausapusap tu hurumna. Dungi diambalhon muse ponji i tu parate jala padompak parnidaanna tu si Marno na tong dope pasande dirina di jandela.

“Marno, ito hasian.”

“Boha?”

“Ndang hea dope huhilala dibege ho sahat tusi, nangi?”

“Tutu ndang hea, Jein.”

“Ia na jat do i? Boha sampe sintap rohangku ndang mangalaninghon si uncle Tom na saleleng on?”

Mengkel suping si Marno. “Ndada apala huboto, Jein.”

“Diboto ho do? Sian botari ondeng apala tung nuaeng ho huida mengkel suping. Boasa?”

Mengkel suping muse si Marno, “Tutu, ndang apala huboto, Jein.”

“Oh, ito Marno hasian na lagu. Mandok mauliatema ho nian tu ahu. Nunga be hupajimpo janjingki.”

“Aha tahe i, Jein?”

“Piyama, bajubajum laho modom. Nunga hutuhor be diho piyama nangkining. Hutuhor do nasiat diho! Paima jolo hubuat da….”

SONGON sada ursa na mulak gogo ala naung palelenghu manisio, hipu do si Jein mangangkatangkat tu bilutna. Jala ndang sampe marbilang urur, minar do bohina haruar sian bilut i maniop porhosan na gabe siluana tu si Marno.

“Sai lomoma roham mamangke na hupillit on.”

Dipatedekma porhosan i asa dipasuman jala dipagainggaing isina i tu andorana.

“Nda lomo roham na hupillit on?”

“Piyama na lehet do on, Jein.”

“Pangkehonma borngin on. Huhilala nunga toho borngin asa mamangke bajubaju laho modom.”

Alai menggol do roha ni si Marno mangida piyama naung tiniopna i.

“Ito Jein.”

“Boha dope, hasian?”

“Ndang huboto dope manang na modom dison ahu borngin on.”

“Oh! Na godang do karejom?”

“Ndang sadia godang nian. Alai,,, ndang huboto tahe….”

“Na marngilutan do dagingmu?”

“Jimpo do sude. Alai,,, eh, ndang huboto, Jein”

“Molo songon i sai manganju pe ahu, hasian. Ndang pola husungkuni be ho.”

“Mauliate ma hudok tu ho, ito Jein.”

“Huporhosma muse piyamamon.”

“Songon dia pe didok roham. Alai saema huhilala ndang na ingkon mulak ahu mamboan i.”

Tong do diporhos si Jein piyama i, alai asa diboan masuk tu bilutna. Jala nangetnanget nama mardalan si Jein haruar sian bilut i, hira naso boi be mangurdot.

“Ra nunga boi ahu mulak saonnari, Jein.”

“Sai natalipononmu do ahu tu pudi ni ari on; nangi?”

“Olo, ito Jein.”

“Tingki sadihari asa hupaima i?”

“Eh, ndang huboto manang sadihari, Jein. Alai hupahatop pe.”

“Nomor ni talipongku diboto ho do tahe? Di Eldorado….”

“Nunga huboto, ito Jein.”

Dungi diummahon si Marnoma nangetnanget pardompahan ni si Jein, pardompahan na dipature songon pinggan pasu i! Dungi magoma si Marno di balik ni pintu jala holan satongkin do tarbege si bilut ni si Jein langkana tingki manuati balatuk.

Di bilutna, di podomanna, ndung mamondut manang piga sipanok mata, dihilala si Jein do naung matonu ponjina. Ra nunga dumarede iluna ndung mangapian saborngini tu si Marno [.] (Tamat)

sumber : http://mulaharahap.wordpress.com/

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Blog Stats

  • 635,526 hits

Arsip

%d blogger menyukai ini: